هام لكل من يرغب في تربيه القطط:
مبدئيا احب اذكر الجميع ان القطط والحيوانات عموما روح زيها زينا بالظبط وعدم قدرتها على النطق ده لا يعني اطلاقا انها غير قادره على الاحساس والحزن والكره والحب او فقدانها للمشاعر بالعكس هما يمتلكوا من المشاعر اكتر مننا بكتير و ديما بيكون عندهم رد لتصرفاتنا معاهم سواء كنا بنعاملهم بحنان او بقسوه ياريت نتقي الله فيهم قبل اي شيء ونشيل من قلوبنا الانانيه وحب الامتلاك في تعاملنا معاهم واللي قادر على اسعادهم وتوفير الراحه والامان ليهم يربيهم اما اللي يعجز عن ده له كل الاحترام والتقدير على مشاعره الرقيقه ورجاء بلاش يربي في بيته حيوانات ويكون مقصر معاهممبسوطةمبسوطة
نبدا في الموضوع ويارب يكون فيه افاده لكل الناس اللي بتبدأ في التربيه او اللي بيفكروا لسه يربوا قطط
اولا : ايه الحاجات اللي لازم تكون موجوده في البيت قبل ما القطه تشرف
____________________________________________
1- صندوق الفضلات ( الليتر بوكس )
لازم يكون مناسب لحجم القطه اذا كانت القطه صغيره نجيب صندوق حوافه صغيره علشان تقدر توصله والا احنا اللي هنتحمل نتيجه عدم قدرتها على الوصول ليه والقطه مفيش عليها اي لوم , واذا كانت القطه كبيره لازم الصندوق يكون مناسب لحجمها علشان تقدر تقعد فيه وكمان لما تخلص تواليت وتيجي تردم بالرمله متبهدلش الدنيا والرمله تطلع بره الصندوق يعني الموضوع لازم يكون نسبه وتناسب بين حجم القطه وحجم الصندوق , وافضل انواع الصناديق هي المفتوحه علشان التهويه
2- مغرفه او فرشه لازاله الفضلات
ودي مهمه جدا في تنظيف الرمله حتى لو كانت معطره ومش عامله اي ريحه وحشه في البيت لازم تتنظف كل يوم وقايه من الامراض والحشرات حفاظا على صحتهم وصحتنا احنا كمان و علشان القطه تفضل تستعمل الليتر بوكس لان الزمله اذا مش نظيفه القطه مشبتعمل تواليت فيها وطبعا هتعمل تواليت في اي مكان تاني و بردو اللوم علينا
3- طبق الاكل , طبق الميه
في اطباق معدن وخرف وبلاستيك وافضلهم البلاستيك لسهوله تنظيفه وكمان علشان مش بيتفاعل مع الاكل او الميه خصوصا الميه لانها بتفضل موجوده ادام القطط بشكل مستمر
4- سرير للقطه
وده ممكن يكون جاهز من المحل وممكن نعمله في البيت اهم حاجه الخامات تكون مريحه وناعمه و سهه التنظيف والخامات القطنيه هي الانسب على الاطلاق لكل فصول السنه والسرير لازم يكون مريح طبعا لان القطط بتقضي وقت طوووووووويل جدا وهما نايمين يعني لازم يكون واسع وطري علشان يناموا ويتقلوبوا بمزاج
5- مشط واسع , مجفف شعر , بودره تلك , فوط , بانيو اطفال , قصافه اظافر
للنظافه اليوميه والاسبوعيه للشعر و الاظافر
خلاص كده جهزنا كل الحاجات اللي عاوزينها قبل ما القطه نروح للنقطه اللي بعدها
ثانيا : تجهيز البيت لاستقبال القطه
____________________
سعيدة قويسعيدة قوي
ياريت ناخد لفه في البيت كده ونشوف الحاجات دي
1- شباك فوق بوتاجاز ننقل البوتاجاز من تحته او نقفل الشباك تماما لان القطه ممكن تقرر فجأه انها تطلع تشم الهوا شويه في الشباك ده وطبعا الوسيله الوحيده لوصولها عند الشباك هي البوتاجاز ف هتتفضل مشكوره وتنط فوقه وهي محظها بقى النار شغاله او لا في حاجه سخنه على البوتاجاز او لا يعني احنا ونصيبنا يبقى الحل اننا نشيل البوتاجاز او نقفل الشباك علشان مش يلفت نظر القطه وعموما اي شباك ياريت يكون متركب عليه سك علشان القطه مش تطع تقعد عليه وتسرح بخياها وفجأه تلاقي حد بيخبط عليك وبيقولك (القطه دي بتاعتك ؟) طبعا هتكون الهانم وقعت في الشارع والله اعلم ايه اللي ممكن يكون حصل من الوقعه دي علشان كده لازم ناخد بالنا كويس اوي من الشبابيك والبلكونات لازم تكون بتتقفل ويتركب سلك بحيث تعمل اللي عليها في تهويه المكان وفي نفس الوقت تحافظ على حيات القطه وسلامتها
2- اكيد كلنا عندنا انتيكات وفزات وغيره من الحاجات القابله للكسر بنستعملها في الديكور طبعا مش هقول نستغنى عنها بس نحاول نحطها في مكان آمن ومش سهل تقع من عليه و تكون المسافه بينها وبين الحاجات اللي جنبها كافيه لمرور القطه منها بسهوله علشان القطه اكيد اول ما هتدخل البيت وتبدا تهدى هتفضل تلف وتشمشم وتكتشف في البيت حته حته تدخل تحت سراير وتطلع على ترابيزات وارفف وممكن دواليب كمان اذا حست ن في داعي ومحدش يقدر يتوقع هي هتحب تكتشف ايه بالظبط ف ياريت نخلي بالنا لو في اي حاجه تتكسر نعم زي م قولت حفاظا على سلامه القطه من الجروح وكمان منعا لحدوث تلفيات في ديكورات البيت
3- البيت فيه منظفات ومطهرات ومبيدات حشريه ده اكيد لازم نلمها كلها ونحطها في درفه مقفوله تكون عاليه والقطه متقدرش توصلها علشان لحاجات دي خطر جدا عليها مش بس انها تشربها حتى ملامستها لقطه فيه خطر على جلدها ولو جه منها اي حاجه على فرو لقطه والقطه لحست لفرو علشان تنظفه يجيله تسمم وندخل في دوامه وياعالم هنخرج منها بالقطه سليمه ولا هنفقدها لا قدر الله
4- اذ كان البيت ليه حديقه او في زرع جوه البيت او في البلكونه ياريت نسال الدكتور البيطري اللي ناوين نتابع معاه علشان نعرف ايه النباتات اللي ممكن تضر القطط في حل نه عضتها او اكلتها علشان في نباتات بتكون خطر جدا على القطط وتوصل للتسمم لا قدر الله
معلش طولت عليكم بس اعمل ايه البيت ناقصه شغل كتير قبل ما القطه تيجي عموما هانت خلاص دي اخر حاجه هنعملها قبل ما نجيبها
ثالثا : تهيئه العائله لاستقبال القطه
____________________
سواء كان الناس اللي عايشين معاك اطفال او ناس كبيره نسبه احتمال مواجهه لمشاكل وصعوبه القناع والسيطره هتكون ضعيفه في الاول ومع الوقت ان شاء اله هتزيد ونبدأ بمخضوضةمخضوضة
الأطفال و دول محتاجين سيطره على تصرفاتهم يعني لازم ننبه كويس عليهم بلاش اول ما القطه تدخل نهجم عليها مره واحده كلنا القطه هتطلع الاول وتكون خايفه وتستخبى شويه ولما تطمن هتخرج وتلف في البيت تكتشفه وهتيجي تتعرف علينا لما القطه تيجي عند الطفل نعلمه ازاي يمد ايده ويثبتها علشان القطه تشمها وتمسح وشها فيها ( لو جالها مزاج يعني ) و تكمل تعارف على باقي الاسره من غير ما حد يشيلها ولا يلعب معاها لعب من اللي احنا عارفينه ده
الاب والام ودول للاسف لو مش مقتنعين ( زي اللي عندي كده ) تبقى مشكله محتاجه اقناع ودلائل وبراهين وحجج كافيه لمواجهه اي انتقاد او هجوم او اي سبب للؤفض طبعا بشرط ان اللي عاوز يجيب قطه ميكونش جاب قبل كده وعقدهم من القطط خلاص ( زي ما انا عملت ) يعني اذا قالو وحشه للبنات نرد على طول نقولهم لا ابدا القطه لو متربيه في البيت وواخده التطعيمات ومش بتاكل اكل مش مستوي ولا لبن مش مغلي ولا خضار مش مغسول كويس مبيكونش في اي خطر منها و بعدين في ناس كتير بيجيلهم تكسوبلازما من غير ما يربوا قطط ..... وهكذا , لو قالو البيت مش هيبقى نظيف نقوم قايلين نفس الابدا اللي قولناها الاول بس المره دي نضيف ان القطط بتنظف نفسها ومش بتعمل تواليت الا في الليتر بوكس وهاديه ومش بتعمل اي قلق في البيت .... واستمروا بقى على نفس الاسلوب لحد ما يقتنعوا بدل ما نجيب القطه من الباب وهما يرموها من الشباك
صعبان عليهصعبان عليهصعبان عليهصعبان عليه
خلاص كده يا جماعه القطه جت الحمد لله ودخلت البيت وعملت جوله الاكتشافات بتاعتها نبدا نحط الميه والاكل والليتر بوكس ونعرفها مكانهم كويس علشان تعرف توصلهم هي هتبدا تشرب وتاكل وناخد بالنا الميه لازم تتغير باستمرار والاكل لازم ننوع فيه علشان تاخد كل العناصر الغذائيه اللي بتحتاجلها ومش تمل من نوع واحد بيتقدملها باستمرار
والاكل بينقسم لنوعين : دراي فود مهم جدا للقطط لانه بيمدهم بمواد غذائيه وفيتامنز وكمان اكه بينظف الاسنان ويمنع تكون الجير وبالتالي يمنع التهابات اللثه والتسوس وده بيكون جاهز من محلات القطط والعيادات البيطريه و لازم نجيب المناسب لسن القطه يعني في اكل للكيتنز واكل للقطط الكبيره ناخد بالنا كويس من النقطه دي وافضل الانواع الموجوده رويال كانين - كات شو - مياو ميكس ونحذر جدا من الانواع التانيه سواء المستورده اللي ليها اسم تجاري كبير بس للاسف بتسبب امراض للقطط او الانواع المحلي اللي اغلبها بيكون منتهي الصاحيه اصلا والقطط مش بتعرف تفرق بين السليم والفاسد بس الريحه بتشدهم وبياكلوا والنتيجه بتكون امراض على مستوى اجهاز البولي والهضمي و الشعر والمناعه
تاني حاجه اكل البيت وده اللي احنا بنجهزه لقططتنا ولازم ننوع فيه على اد ما نقدر سواء بالمكونات او طريقه الطهي
الخضار (كوسه - بطاطس - جزر - فاصوليا ... اي خضار متوفر )
اللحوم ( فراخ - لحمه - كبد فراخ - سمك ) كبد الفراخ والسمك ياريت نقلل منهم علشان كتر اكلهم مضر للقطط منتجات الالبان ( لبن خالي الدسم - زبادي خالي الدسم- جبنه مثلثات خاليه الدسم ) ولازم نفرق بين خالي الدسم والخالي من اللاكتوز
ممكن كمان ناكلهم بيض مسلوق مش اي حاجه تانيه غير المسلوق واذا لاحظنا وجود حساسيه يبقى نوقف اكله فورا وفي قطط كتير بتحب البقوليات المجففه زي الفول والفاصوليا البيضا ممكن نقدمها بس ميكونش اعتمادنا عليها بدل الخضار الطازج وسلق الاكل سواء خضار او لحوم بيكون في ميه بدون بهارات ولا ملح ولا بصل ولا توم وممكن نشوي الاكل بد ما نسلقه ريحته بتشد القطط اكتر خصوصا لو كانت احوم بتستوي مع الخضار بتكون الريحه تحفه ( بلاش حد يطمع في الاكل لو الريحه عجبته ) وطبعا لازم اللحوم تكون خاليه من الجلد والعضم تماما وممنوع اضافه اي ماده دهنيه
يا ريت يكون الموضوع مفيد ليكم واسفه جدا اني طولت اوي كدهسعيدة قويسعيدة قوي
"منقول"
أتأسف جداً إذا كان القسم غير مناسب لكن برأيي هو المناسب لأني لم أجد قسم آخر .
و إيه رأيكم ؟
مستنية ردودكم الحلوة .